ڪنهن به سياسي جماعت جو ڪٽر طرفدار،جيڪو جماعتي پاليسن جي معاملي ۾ ڪنهن به ٻئي فرد يا جماعت جو موقف ٿڏي ڇڏي. هي اصل ۾ هڪ ناڪاري تصور آهي، جيڪو ڪنهن مخصوص ڌر سان انتها پسنديءُ جي حد تائين لاڳاپي کي ظاهر ڪري ٿو. ٻئي طرف ٻين عالمي جنگ دوران جرمنيءَ جي خلاف گوريلا جنگ وڙهندڙ قبضي ۾ آيل يورپي ملڪن جي ويڙهاڪن کي Partisan به چيو ويندو آهي. مثال طور، ٻي عالمي جنگ دوران هٽلر جي فوجن مشرقي ۽ مغربي يورپ جي ڪيترن ئي علائقن تي قبضو ڪري ڇڏيو. جرمنيءَ جي انهن قابض فوجن کي پنهنجي ملڪن مان ڪڍڻ لاءِ، اوڀر يورپي ملڪن خاص طور يوگوسلاويه ۾ Partisans زبردست مزاحمتي جنگ وڙهيا. ساڳي طرح اپريل 1945ع ۾ شڪست کائڻ کانپوءِ، اٽليءَ ۾ ’بينيتو مسولينيءَ‘ خلاف جمهوريت پسند انقلابين هٿياربند جدوجهد تيز ڪئي ۽ مسولينيءَ کي سُئٽزرلنڊ جي سرحد وٽان گرفتار ڪري ڦاهيءَ تي ٽنگيو. انهن مُجاهد يا انقلابي ٽولن کي به Partisans يا ”عوامي محافظ“ سڏيو وڃي ٿو. ان کان علاوه ڪنهن به سياسي پارٽيءَ جي انتهاپسند حاميءَ کي به ساڳئي اصطلاح سان سڏيو ٿو وڃي